പ്രണയത്തിന്‍റെ വിഷാദ ഭാവം
ഇടയ്ക്കിടെ എനിക്കു തോന്നുന്നു, നീ സൃഷ്ടിക്കപ്പെട്ടത് എനിക്കു വേണ്ടി മാത്രമാണെന്ന്; നക്ഷത്രക്കൂട്ടങ്ങൾക്കിടയിൽ നിന്നു നിന്നെ മണ്ണിലേക്കു വിളിപ്പിച്ചതും എനിക്കു വേണ്ടി മാത്രമാണെന്ന്….
കഭീ കഭീ മേരേ ദിൽ മേ
ഖയാൽ ആത്താ ഹേ,
കെ ജൈസെ തുഝ്കോ
ബനായാ ഗയാ ഹെ മേരെ ലിയേ…
എന്ന് മുകേഷ് കുമാറിന്‍റേതല്ലാതെ മറ്റാരുടെ ശബ്ദത്തില്‍ കേട്ടാലാണ് മലയാളത്തില്‍ ഇങ്ങനെ ചിന്തിക്കാനാവുക! ആ ശബ്ദം സൃഷ്ടിക്കപ്പെട്ടതു തന്നെ പാടാൻ വേണ്ടിയാണ്. നക്ഷത്രങ്ങള്‍ക്കിടയില്‍നിന്ന് മണ്ണിലേക്കിറങ്ങി വന്ന അഭൗമ നാദം… കിഷോർ കുമാറിന്‍റെയും മുഹമ്മദ് റഫിയുടെയും സമകാലികൻ… അവരോടു ചേർത്തു വയ്ക്കുമ്പോൾ പാട്ടുകളുടെ എണ്ണത്തിൽ എന്നും പിന്നിലായിരുന്നു മുകേഷ്. എന്നിട്ടും പാടിത്തീർത്ത ഓരോ പാട്ടുകളും അവർക്കൊപ്പം തന്നെ മുകേഷിന്‍റെ പേരും കുറിച്ചിട്ടു, അനശ്വരമായി. സൈഗാളിന്‍റെ പാട്ടുകളെ ജീവനെപ്പോലെ സ്നേഹിച്ചിരുന്ന ഗായകൻ. വെള്ളിത്തിരയിൽ രാജ്കുമാറിന്‍റെയും ദിലീപ്കുമാറിന്‍റെയും പ്രണയത്തിന്‍റെ ശബ്ദമായി മാറിയവൻ. ഹൃദയം മുറിയുന്ന വേദനയിലെന്ന പോലെ മുകേഷ് പാടിക്കൊണ്ടിരുന്നു…. നിന്‍റെ ഹൃദയം മുറിപ്പെട്ടുവെങ്കിൽ, ആരെങ്കിലും നിന്നെ തീരാത്ത സങ്കടത്തിലാഴ്ത്തിയാൽ,അപ്പോഴൊക്കെയും പ്രിയേ എന്നടുത്തേക്കു പോരൂ….എന്റെ വാതിൽ തുറന്നു കിടക്കുന്നു…അതെന്നും തുറന്നു തന്നെ കിടക്കും നിനക്കായി..
കോയി ജബ് തുമാരാ ഹൃദയ് തോഡ് ദേ, തഡപ്താ ഹുവാ
ജബ് കോയി ഛോഡ് ദേ,
തബ് തും മേരേ പാസ്
ആനാ പ്രിയേ….
ഡൽഹിഡൽഹിയിലെ ഒരു സാധാരണ കുടുംബത്തിൽ ആറു മക്കളിലൊരുവൻ. മുകേഷ് ചന്ദ് മാഥൂർ. അപ്രതീക്ഷിതമെന്നു പറഞ്ഞാൽ മുകേഷിന്‍റെ കാര്യത്തിൽ അതൊട്ടും കൂടുതലാവില്ല. പഠനത്തിനു ശേഷം മറ്റെല്ലാവരെയും പോലെ കുടുംബം പുലർത്താൻ ജോലി ചെയ്തിരുന്ന ഒരു സാധാരണക്കാരൻ. സഹോദരിക്കു വേണ്ടി ഏർപ്പാടാക്കിയ സംഗീത ക്ലാസുകൾ കേട്ടു പഠിച്ച് ഒരു ഗായകനാകുമെന്ന് ഒരു പക്ഷേ അന്നൊന്നും ആരും കരുതിയിരിക്കില്ല. പക്ഷേ, ഒളിച്ചു വയ്ക്കാനാവാത്ത സുഗന്ധം പോലെയായിരുന്നു മുകേഷിന്‍റെ ആത്മാവിലെ സംഗീതം. സൈഗാളിന്‍റെ മായിക ഗാനങ്ങൾ കാണാതെ പഠിച്ചു മന്ത്രിച്ചു നടന്ന കാലം. സഹോദരിയുടെ വിവാഹദിനത്തിലായിരുന്നു അടു ത്ത ബന്ധുക്കളിലൊരാൾ മുകേഷിന്‍റെ ജീവിതത്തെ തന്നെ വഴി തിരിച്ചു വിട്ടത്. ജോലി അവസാനിപ്പിച്ച് പിന്നെ സംഗീത ലോകത്തേക്ക്. നിർദേശ് എന്ന സിനിമയിലെ ദിൽ ഹി ബുദാ ഹുവാ ഹോ തൂ… അതായിരുന്നു മുകേഷിന്‍റെ ആദ്യ സിനിമാ ഗാനം. മുകേഷ് തന്നെയായിരുന്നു ആ പാട്ടുമായി വെള്ളിത്തിരയിലെത്തിയതും. പക്ഷേ, അതൊന്നുമായിരുന്നില്ല മുകേഷ് എന്ന ഗായകനെ ചലച്ചിത്രലോകത്ത് അടയാളപ്പെടുത്തിയത്. അതിനു പിന്നെയും കാത്തിരിക്കേണ്ടി വന്നു, പെഹ്‌ലി നസർ എന്ന ചിത്രമെത്തും വരെ.
ദിൽ ജലാത്താ ഹേ തോ ജലാനേ ദേ
ആർസു നാ ബഹാ ഫരിയാദ് നാ കർ…
മുകേഷ് എന്ന ഗായകന് ചലച്ചിത്രലോകത്ത് ചിരപ്രതിഷ്ഠ നേടിക്കൊടുത്ത വരികൾ. സൈഗാളിനെ പ്രാണനെപ്പോലെ ആരാധിച്ചിരുന്ന ചെറുപ്പക്കാരന്‍റെ സ്വരമാധുര്യം കേട്ടു സ്വയം മറന്ന് സാക്ഷാൽ സൈഗാൾ പോലും അഭിനന്ദിച്ചു: “”എത്ര വ്യത്യസ്തമായ ആലാപനം, എന്നെപ്പോള്ളൊരാൾക്കൊന്നും ഒരിക്കലും അങ്ങനെ പാടാൻ കഴിയുകയേയില്ല….”
പിന്നെ പാട്ടുകളുടെ വസന്തകാലമായിരുന്നു. മേള, ആഗ്, വിദ്യ, അനോഖി അദാ, അന്താസ്, ബർസാത്ത് പർവാരിഷ്… അങ്ങനെ ക ൈനിറയെ ചിത്രങ്ങൾ, കണ്ഠം നിറയെ പാട്ടുകൾ. അതിനിടെ മികച്ച ഗായകനുള്ള ദേശീയ ചലച്ചിത്രപുരസ്കാരം ഉൾപ്പെടെ ഒട്ടനേകം അവാർഡുകൾ. 1974ൽ രജ്നീഗന്ധ എന്ന ചിത്രത്തിലെ ഗാനത്തിനായിരുന്നു ദേശീയപുരസ്കാരം എത്തിയത്.
കഹി ബാർ യൂ ഭീ ദേഖാ ഹേ,
യെ ജോ മൻ കി സീമാ രേഖാ ഹേ
മൻ തോഡാനേ ലഗാത്താ ഹേ,
അൻജാനേ പ്യാസ് കെ ബീച്ചേ…
അക്കാലത്തെ സൂപ്പർസ്റ്റാർ രാജ്കുമാറിന്‍റെ സ്ഥിരം ശബ്ദമായിരുന്നു മുകേഷിന്‍റേത്. നീൽ കമൽ എന്ന ചിത്രത്തിൽ പാടിക്കൊണ്ടാണ് മുകേഷ് – രാജ്കപൂർ ജോഡി തുടങ്ങുന്നതെങ്കിലും, ഇരുവരുടെയും ആദ്യത്തെ ഹിറ്റ് 1948ൽ പുറത്തിറങ്ങിയ ആഗ് ആയിരുന്നു. പിന്നെ മുകേഷ് – രാജ് കപൂർ ജോഡിയുടെയും വസന്തകാലമായിരുന്നു. മേരാ നാം ജോക്കർ, അനാഡി തുടങ്ങിയ മ്യൂസിക്കൽ ഹിറ്റുകളിലൂടെ പിന്നെയും നിരവധി ഗാനങ്ങൾ.
ഇതൊക്കെയുണ്ടെങ്കിലും, മുകേഷിനെക്കുറിച്ചു പറയുമ്പോൾ ആദ്യം മനസിലെത്തുക പ്രണയ വിഷാദത്തിന്‍റെ മധുരം ചാലിച്ച ആ മനോഹര ഗാനം തന്നെ… കഭീ കഭീ മേരെ ദിൽ മേ… ലത മങ്കേഷ്കറുടെ മനോജ്ഞ ശബ്ദത്തിൽ ഇഴ ചേർന്ന് മുകേഷിന്‍റെ നാദം രചിച്ച ഇതിഹാസ ഗാനം.
തു അബ് സെ പെഹലെ സിത്താരോം
മേ ബസ് രഹീ ധി കഹീ,
തുഝേ സമീൻ പെ ബുലായാ ഗയാ
ഹെ മേരെ ലിയേ…
താരാപഥത്തിൽനിന്നു ഭൂമിയിലേക്കിറങ്ങിവന്ന കാമുകിയെക്കുറിച്ച് മുകേഷ് സ്വയമലിഞ്ഞു പാടിയ ഗാനം. നാലു പതിറ്റാണ്ടുകൾക്കിപ്പുറത്തും പ്രണയിക്കുന്ന മനസുകളിലും പ്രണയം നഷ്ടപ്പെട്ട ഹൃദയങ്ങളിലും തളിരിട്ടു നിൽക്കുന്ന പാട്ട്. 1976ൽ ഒരുപാട് പുരസ്കാരങ്ങൾ ഈ പാട്ടിലൂടെ മുകേഷിനെയും ലതയെയും പാട്ടെഴുതിയ സാഹിർ ലുധിയാൻവിയെയും ഈണമിട്ട ഖയ്യാമിനെയുമൊക്കെ തേടിയെത്തി. കഭീ കഭീ എന്നു തന്നെ പേരുള്ള സിനിമയിൽ അമിതാഭ് ബച്ചനും രാഖി ഗുൽസാറും അനശ്വരമാക്കിയ പ്രണയരംഗങ്ങൾ മുകേഷിന്‍റെ പേരു കൂടിയാണ് പ്രണയത്തിന്‍റെ വിഷാദ ഗായകൻ എന്ന നിലയിൽ അനശ്വരമാക്കിയത്.
1300 പാട്ടുകൾ മുകേഷ് പാടി. മേരാ നാം ജോക്കറിലെ ജീനാ യയഹാം മർനാ യഹാം, മിലനിലെ സാവൻ കാ മഹീനാ, പെഹ്ചാനിലെ സബ്സെ ബഡാ നാദാൻ… അങ്ങനെ എന്നെന്നും മോഹിപ്പിക്കുന്ന എത്രയോ ഗാനങ്ങൾ. 1976ൽ മകൻ നിതിനുമൊത്ത് അമെരിക്കയിൽ അവതരിപ്പിച്ച ഒരു സംഗീത പരിപാടിയായിരുന്നു മുകേഷിന്‍റെ ശബ്ദം അമൃത വർഷിണിയായ അവസാന സദസ്. സംഗീതത്തിന്‍റെ ലോകത്തു നിന്നു മുകേഷ് പടിയിറങ്ങിപ്പോയി. പക്ഷേ, പ്രണയത്തിന്‍റെ തീരാത്ത നിറയൗവനം പോലെ ആ ശബ്ദം ഇന്നും മുഴങ്ങിക്കൊണ്ടിരിക്കുന്നു….
.jpg)
ങ്ങള് പുലി തന്നെ കേട്ടാ...
ReplyDeleteപക്ഷേ, പ്രണയത്തിന്‍റെ തീരാത്ത നിറയൗവനം പോലെ ആ ശബ്ദം ഇന്നും മുഴങ്ങിക്കൊണ്ടിരിക്കുന്നു….
ReplyDelete